PrincessFake

20170211 DAY 1 廣島 > 米子

香港飛廣島其實都唔係好多機, 今次能夠準時起飛準時降落, 真係好難得. 香港的2月其實都唔凍, 但今次去廣島仲竟然落雪, 所以準備好外套﹑冷帽﹑頸巾.

17:00 到達廣島機場, 一落機, 就見到出面都舖滿雪. 原以為要搞好耐先出到境, 點知仲可以搭到 17:45 的巴士出去廣島市. 因為廣島機場出廣島市係冇鐵路, 只有搭巴士. 巴士的班次都唔係好多, 一早就check清楚趕車. 廣島機場都較細, 一出境拎左行李出去就見到巴士站. 但要先買巴士票, 好緊張會趕唔到車. 不過見到巴士條龍好長. 第一架車我地已經上唔到, 不過好彩佢有加開車. 雖然都唔知點解, 但好彩唔洗等下一班.

一早決定好今次7日之旅唔止停留廣島, 仲會去埋岡山和鳥取. 其實係好CHUR的, 不過香港人嘛 haha. 所以出到去廣島就買車票去岡山, 再轉車去鳥取. 今次買左張7 Day Pass, 已經包晒今次去D地方的JR. 因為之前只係試過買大阪的Pass, 原來山陽山陰地區的Pass不是用閘機, 而係係出入閘時用人工札口比工作人員Check票. 

其實 19000YEN 好似好貴咁, 但因為我都去幾個唔同的地區, 所以已經係有賺.

21:40 係岡山上車, 原定 23:49 到米子. 不過去到山陰地區落大雪, 火車開得好慢和間中都停下來等. 見到咁大雪其實好興奮, 不過架車暖氣好勁, 愈坐愈辛苦啦...最後都遲左一個鐘, 24:40 終於都到啦. 一出火車站, 嘩... 全部都係雪呀. 完全睇唔到條路係邊到, 明明酒店就係係火車站對面, 但當我拖到個喼過對面的時候, 個人好似已經虛脫左咁.

樓下咩都冇開啦, 唯有去Family Mart啦. 明明只係5分鐘的路, 我諗我行左30分鐘架啦. 第一次見到雪係好興奮, 仲邊行邊影相, 係Family Mart買完野出黎, 仲落雪呀. 其實D雪打落塊面到好痛架...XD

雪, 全身都係雪. 

好好休息一晚, 聽日就出發去足立美術館和去搵鬼太郎啦.