201705*戀戀英國與瑞士之旅－PrincessFake

20170515-20170529 英國瑞士之旅前言

首先想講就係呢張機票係超便宜的機票, HKD$2200飛歐洲喎, 機會真係只得一次, 個次之後我就冇再見過有咁平既機票啦. 點解會揀英國瑞士咁去? 本身就一定會揀英國既(戀英嘛...), 但對瑞士除左瑞士火鍋之後就冇咩認知,所以單純係因為咁樣買機票係最平. 但之後先發覺咁樣太蠢啦, 去完英國先去瑞士係災難...係因為瑞士基本上都冇咩買, 但英國又太多野買, 結果就係災難式地搬行李囉. 千萬千萬唔好再咁做!!!!

去程係坐Austrian airlines, 但就要轉機同係係香港中午時出發, 所以去到英國就會係夜晚.

港女指定相片

出發時仲有落雨~~

上機啦~~ 坐位幾舒服, 有得叉電, 不過D戲就好似唔算新.

晚餐：沙律, 餐包, 雞扒薯蓉, 蛋糕, 唔夠飽餐包係有得refill, 飛機餐黎講都吾係差. 餐前已經有比餐飲, 餐後再比, 基本上全程飛機佢都不停咁問你要吾要飲野.

早餐：焗通粉, 我都係鍾意食火腳通多d.

飛機行程: Hong Kong > Vienna > London (Heathrow). 第一程先搭12個鐘, 之後轉機再搭多2個幾鐘. 不過就要小心轉機過程, 我地買既時候就已經知道轉機時間只得半小時, 係好趕好趕好趕. 係轉機時要對清楚個班機number, 一定一定一定要睇清楚個閘口有冇改!! 否則, 就會好似我地咁就會~~去錯閘口~~. 太白痴啦!!!! 當我地去到錯個個閘口, 閘口人員同我地講班機飛走左啦喎, 我地真係呆左企晒係到. (閘口人員係冇睇過我地張機票就同我地講我地太遲....) 好在係隔離有個岩岩行過既好好鬼佬睇睇我地張機票, 同我地講我地去錯閘口, 話比我地知個正確閘口, 之後仲帶我地行左一段路. 驚險地半個鐘內係機場跑兩個閘口, 要知道佢地入唔同閘口都會做一次安檢, 一個唔小心走左班機就慘啦. (因為中途我地都見到好多人都行錯呀, 都係比個好好鬼佬折返轉頭架.)

要來回呢條長長的走廊, 真係人都癲.

我都好想係機場到行下呀………

終於去到閘口, 有時間有時間!!! 嚇死寶寶.

去英國事前準備既野唔太多, plan行程就基本啦, 因為以前去過London, 好多市中心既建築其實都去過, 所以今次就諗住可以去下其他地方. 大家都知要預先買海鮮價車票啦, 但因為我地係太Free既人, 所以就諗住買張遊客Pass (BritRail London Plus Pass) 啦, 呢張好好用, 好多我想去既郊區路線都已經包左(e.g. Oxford, Cambridge, Bath, etc), 咁諗住幾時搭車都得啦. 上網比較完之後就諗住向間英國公司 VisitBritain Shop 買啦, 見佢係倫敦政府認可, 又好似好多人向佢買過咁. 而且我地有英國住址, 諗住都好方便啦, 英國寄英國境內實無錯啦. 買之前就同我地講最快就3日收到, 點知3日後收唔到 (我地落機個日), 之後客服就覆我地要3-5日先收到, 咁我地就調行程諗住等佢張票. 點知5日後都收唔到!! 直到我地走個日都係冇見過張車票既. 然後就係一句Sorry同搞一輪既退錢囉. 捱貴車票都算(係好L貴!!), 但搞到行程唔上唔落要臨時調黎調去就真係太煩, 甚至取消D景點就太令人失望.

所以以後都唔好再係 VisitBritain Shop 到買票了!!!!

第二程就係London (Heathrow) > Swiss (Geneva). 呢程係Swiss Airline, 時間就差不多3小時. 因為係短途機, 所以係冇電視, 但係會比小食飲品同朱古力. 唯一想講既係, 成班飛機係冇乜亞洲人的. 入境時, 海關就充滿一臉疑惑咁望住我地4個港女. 而且我地過關係快過人地歐盟個條線架!! 記住記住Geneva只要你有住酒店/hostel係可以拎Free既搭車卷, 但要記住係入境大堂到拎! 一出左關就冇得拎架啦.

而瑞士就出名雪山風景靚+物價高, 基本上都冇咩消費既, 買得最多野咪就係係超市囉~(除非你諗住買撈啦)~~而且我就覺得瑞士人並冇英國人咁nice, !!純個人感覺!! 之後再講.

之後就係回程啦. 回程: Swiss (Zurich) > HK. 呢程都係Swiss Airline, 而且係直航機, 大家玩完咁多日, 所以就算12個鐘都一定好好訓. 而Zurich個機場都有算大既, 而且係先過安檢, 就會見到Duty Free同其他店, 去到閘口前先過海關的, 過完海關我地係仲要搭無人駕駛. 所以記住預早d去閘口呀. 咁大家就開開心心返屋企啦